Sunday, January 14, 2018

நினைவில் காடுள்ள மிருகங்கள் !!! (The Common Sense இதழில் வெளிவந்த எனது கட்டுரை )







https://drive.google.com/open?id=11ItjHDvPRhseyKgw95IQsJLSqQzxpUy4-- 
முழு இதழையும் இணைத்துள்ளேன்


  பாரம்பரியம் , கலாசாரம் பேசும் தமிழ் சமூகத்தில் காலம் காலமாக  இருக்கிறது  ஆணவக் கொலைகள்.கணியன் கூத்திலும் , வில்லுப்பாட்டிலும் இதற்கான சான்றுகள் இருக்கின்றன .

கன்னிச்சாவு என்னும்  நாட்டுப்புற இலக்கியத்தில் , இவை தீட்டுச் சடங்கு கொலை என விவரிக்கப்ப்டுவதாக கூறுகிறார் ஆய்வாளர் எ .கே பெருமாள் . கி பி பதினாறாம் நூற்றாண்டு காலம் முதல்  சான்றுகள் இருப்பதாக கூறும் அவர் , இது தொடர்பான ஐம்பது கதைகளையும் சேகரித்து உள்ளார் .  சாதியால் கட்டமைக்கப்பட்ட காட்டுச் சமூகமாக நாம் இருந்துள்ளோம் .

இருந்தோம் இல்லை ,இன்னும்  அப்டித்தான் இருக்கின்றோம் என்பதை அதிர, அதிர பறை அடித்துச் சொல்கிறார் கௌசல்யா .

நவீனமயமாக்கலும், உலகமயமாக்கலும் , தொழில்நுட்ப முன்னேற்றங்களும்  கண்களை மறைக்க எல்லாவிடத்திலும் எளிதாக கேட்கப்படும் கேள்வி- இப்ப எல்லாம் யாருங்க சாதி பாக்குறா ?

நினைவில் காடுள்ள மிருகங்கள் நம்மில் பரவலாக உலாவிக் கொண்டுதான் இருக்கின்றன .இந்த ஐந்தறிவுவாதிகள் பண்பாடு ,பாரம்பரியம் என்று பேசி ,சாதியை மட்டும் காத்து , சாதி சங்கங்களின் கிளைகளை இணையத்தில் , கைபேசியில் நடத்தி ,  அதனை வீரமாகவும் , பெருமையாகவும் பேசித் திரிகின்றனர் .

வெறுப்பினை மட்டுமே மூலதனமாக கொண்டு அதனைக்  குறையாமல் காக்க மிருகத்தனம் முற்றிப்போய்  சங்கர்களை இரையாக்கிக்  கொள்கின்றனர் .

யார் சாதி பார்க்கிறார்கள் என்பதற்கு கவுசல்யாவின் முன் வைக்கப்படும் விமர்சனங்களும், தீர்ப்பை விமர்சித்து இடப்பட்ட பதிவுகளும் பதில்களாக கொட்டிக் கிடக்கின்றன . பிறப்பில் இருந்து இறப்பு வரை சாதி தன் விகாரத்தை காட்டிக்கொண்டே இருக்கிறது . பிரித்துப் பார்ப்பதால் பலன் அடைபவர்கள் தொடர்ந்து அதற்கு தீனி போடுகிறார்கள் .

வாழ்க்கைத்தரம் , உடை , பாவனை , நுகர்பொருட்கள் என அனைத்தும் நவீனமடைந்தாலும்  இந்த ஐந்தறிவுவாதிகளின் மனம்  அப்படியே இருக்கின்றது .பாவம் ஐந்தறிவுதானே !!!

காதல், கல்யாணம் ,கண் முன் கணவனின் கொலை , தானும் தாக்கப்பட்ட அதிர்ச்சி  ,மன அழுத்தம், தற்கொலை முயற்சி, ஏற்றுக் கொள்ள முடியாத இழப்பு , இத்தனையையும்  எதிர்கொண்ட பின்பும்    , மனதிடம் குறையாமல்  சாதி மறுப்பு போராளியாக களத்தில்  நிற்கிறார் கவுசல்யா . அதுவும் நேர்மறையான போராட்டக் களத்தில்.

சாதி மறுப்பு மேடைகளிலும் , திருமணங்களிலும்  அடையாளமாக மாறிவிட்ட கவுசல்யா தொடர்ந்து தன் எதிர்ப்பை தன் செயல்களால் இடைவிடாது பதிவு செய்கிறார் . தன் மீது தொடுக்கப்பட்ட அநீதிக்கு எதிராக வழக்கு தொடர்ந்ததோடு மட்டுமில்லாமல் , 58 தடவை குற்றவாளிகளின் ஜாமீன் மனுக்களுக்கு உறுதியாக எதிர்ப்பு தெரிவித்து இருக்கிறார் .

இவரின் வழக்கும் அதன் தீர்ப்பும் , மனதில் காடுள்ள மிருகங்களுக்கு கடிவாளம் போட்டிருக்கிறது .

தனது  அம்மா உட்பட விடுவிக்கப்பட்ட குற்றவாளிகளுக்கு   எதிராக முறையீடு செய்வேன் என்று நீதிமன்ற வளாகத்தில் இருந்து உறுதியாக சொன்னதெல்லாம் வேற லெவல் . இது பழிவாங்கும் செயல் அல்ல , தன்னை விட , தன்  குடும்பத்தை விட சமூக நீதி முக்கியம் என்ற உறுதி .

ஒரே வருடத்தில் இந்த மாற்றம் எப்படிச் சாத்தியம் ?  இந்த  தீர்க்கமும் , தெளிவும்  எங்கிருந்து வந்தது ?  சங்கர் கொலைக்கு நீதி கேட்டு தொடங்கிய பயணம் , சாதி ஒழிப்பாகவும் , சமூக நீதியாகவும் எப்படி  மேம்பட  முடிந்தது ?   கவுசல்யாவின் வார்த்தைகளில் சொல்ல வேண்டுமெனில் "இப்போது இருக்கும் நான் பெரியாரால் பெற்றெடுக்கப்பட்டவள்" .

தந்தை பெரியார் - இறந்து 44  ஆண்டுகளுககு பிறகும் இந்த மனிதரால்  , சாதியால் பாதிக்கப்பட்ட , கணவனை இழந்த கவுசல்யாவை முடங்கிப் போக விடாமல் ,ஒரே வருடத்தில்  போராளியாக மாற்ற 
 முடிகிறது . பிறப்பு , இறப்பு என்று ஒரு சகாப்தத்தை அளவிட முடியுமா ?  படிக்கும் ஒவ்வொரு முறையும் மனிதன் பண்படும் விதையை அல்லவா எழுத்துக்களாக விதைத்து சென்று இருக்கிறார் ? 

சமூக நீதிக்கு எதிராக எங்கெல்லாம் அடக்குமுறைகள்  கட்டவிழ்க்கப்படுகிறதோ அங்கெல்லாம் கவுசல்யாக்கள் முளைத்து வருவார்கள் . ஏனெனில் இது  "பெரியார் மண்" .

 கவுசல்யாவின்  பலம்   என்பது  பகுத்தறிவின் ,  சித்தாந்தத்தின் பலம் , உங்களாலும் முடியும் ஜாதியவாதிகளே பெரியரைப்  படியுங்கள்  , துருப்பிடித்த சிந்தனைகளில் இருந்து வெளியே வருவது கடினம் தான் . முயற்சி செய்யுங்கள் ,மனநோயில் இருந்து விடுபட்டு ,அதிகபட்சம்  மனிதர்கள் ஆகலாம்.

அறிவூட்டு , உணர்வூட்டு , அணிதிரட்டு -  என்று நீங்கள் தொடங்கிய  "சங்கர் தனிப்பயிற்சி  மையம் " விருட்சமாக வளரவும் , ஆணவக் கொலைக்கு   எதிராக தனிச் சட்டம்  என்ற கோரிக்கை வெற்றி பெற்று , மேலும் பல பரிணாமங்களில் சாதி  எதிர்ப்பை வாழ்வியலாக கொண்டுள்ள   தங்களின் பயணம் தொடரவும் வாழ்த்துக்கள் சகோதிரி !!!

இது கௌசல்யாவின் போராட்டம் மட்டும் அல்ல !  நமது பங்காக ,சங்கர்களும்-கௌசல்யாக்களும் தாங்கள் விரும்பிய வாழ்க்கை வாழ,  சாதி கடந்த சமத்துவமும் , மதம்  கடந்த மனிதநேயமும் நம் சமூகத்தின்  அங்கமாய் மாற , ஆணவக் கொலை என்னும் வார்தையையே தமிழகத்தின் வரலாற்றில் இருந்து அகற்ற ,   நாம்   தவிர்ப்பதோடு  மட்டும் இல்லாமல் நமது பிள்ளைகளுக்கும் சொல்லிக் கொடுப்போம்  "சாதி என்பது கெட்டவார்த்தை"
                                                                                                                                                                                           -பாவி

Monday, December 18, 2017

தமிழ் இருகைக்காக மிச்சிகன் நிதி திரட்டும் கூட்டத்தில் எனது உரை !!!

திரைகடல் ஓடி  திரவியம்  தேடிய  தமிழ்  இனத்தின் முதல் குடியேற்றம் வாணிபத்தால் வந்தது ,சீனத்துடனும், கிரேக்கத்துடனும் நமக்கு முன் தோன்றிய மூத்த குடி வணிக தொடர்ப்பு  கொண்டிருந்தனர் .

பின்  காலனி ஆதிக்கத்தின்   நிர்பந்தத்தால் கடின வேலை செய்வதற்காக   மலேஷியா , சிங்கப்பூர் , மியான்மர் , மொரிசியஸ் , தென் ஆப்பிரிக்கா , பிஜி  போன்ற ன்டுகளிலும் , தீவுகளிலும்  குடி அமர்த்தப்பட்டோம்  . உலகமயமாக்கலின்  தாக்கத்தால்  இரண்டாம்  பெருங்  குடியேற்றம் நமது கல்வியால் வந்தது , தமிழ் என்னும் இனத்தின் அறிவும் , கல்வியும் , இன்று உலகம் முழுவதும் நாம் பரந்து விரிய காரணமாய் இருந்தது .  

வாணிபத்தால் பயணிக்க ஆரம்பித்து , கல்வியால் நாம் பரவியுள்ளோம் , நாம் இப்படி இருக்க இது மட்டும் தான் காரணமா ? இல்லை  இதற்கு மூல காரணம் நமது மொழி , அது கற்றுக்கொடுத்த பண்பாடு , நம் இலக்கியங்களில் உள்ள வாழ்வியல் . பிறப்பொக்கும் எல்லா  உயிர்க்கும் என்பதை  நாம் வாழ்ந்தல்லவா காட்டி உள்ளோம் . 

எப்படி வாழ்வது என்பதை அறியாமல் அறிவியல் படித்து , உயிரியில் படித்து  , கணிதம்  படித்து அல்லது கணினி தான் படித்து என்ன பயன் , திருக்குறளை படித்தால் தானே வாழ்க்கைக்கான படிப்பு கிடைக்கும் ?

நாம் பள்ளியில் பாடமாக படித்தது , நம்மில் பலருக்கு பள்ளிப்படிப்பு முடிந்ததும் தமிழ் படிப்பதும்  முடிந்து விடுகிறது அல்லது  கணினி , கைபேசியில் உள்ள செயலிகலில் வரும் தரவுகளை படிப்பது என்று சுருங்கி விடுகிறது .

அது மட்டும் தான் தமிழ் ஆ ? தமிழா ?

எழுத்தசை , சீர்தளை , அடி தொடை  என வரைமுறை கொண்டு , எழுத்துக்கும் , சொல்லுக்கும் , பொருளுக்கும் , மட்டுமல்லாது ஒரு பாடலை எழுதுவதற்கு யாப்பு , அதில் சுவையை  சேர்ப்பதற்கு அணி  என இலக்கணம் கொண்டு,    ஒரு சிறு புள்ளிக்கும் மாத்திரை அளவு கொண்டு உள்ளது நமது தமிழ் . இந்த அனைத்து விதிகளுக்கும் உட்பட்டு இம்மை அளவும் பிசகாமல் படைக்கப்பற்ற சங்க இலக்கிய நூல்கள் நமது மொழியில் உள்ளன . நேரம் எடுத்து எந்த பாடலை வேண்டுமானாலும் அளவிட்டு பாருங்கள் . வியப்பில் இருந்து மீள வெகு நேரம் பிடிக்கும் .

 இதனை நாம் கற்கவும் அதற்கும் பெருமை செய்யவும் வேண்டாமா .???



காலங்கள் மாற  மாற நமது மொழியும்  மாறுதலுக்கு உட்பட்டுள்ளது  ,  பிராமிய  எழுத்து , வட்டெழுத்தாக மற்றம் பெற்றது , பின்    வட்டெழுத்தாக இருந்தது  பல்லவர் காலத்தில்  மாறுதலுக்கு உடப்பட்டு  கிரந்த எழுத்துக்களை சேர்த்துக் கொண்டது   அவை எழுத்து சீர்திருத்தம்  பெற்று   தற்கால தமிழ் எழுத்துக்களாகின , இப்படி தலை முறை தலை முறையாக தமிழ்  மாற்றம் பெற்று , பல்வேறு பரிமாணங்களை  அடைந்துள்ளது . 

கடந்த இருபது ஆண்டுகளில் தமிழ் காகிதத்தில் இருந்து கணினிக்கு வந்து இப்போது சங்க இலக்கியமும் கணினியில் கற்கிறோம்.



தமிழின் மீது  நமக்கு முன்னாள் இருந்த தமிழர்களின்   தேடல் , ஆர்வம் , வேட்கை நம்மை இங்கு கொண்டு வந்து நிறுத்தி உள்ளது . இது அடுத்த பரிணாமத்துக்கு  கொண்டு   செல்லும் கடமை இப்போது நமக்கு உள்ளது. .

புலம் பெயர்ந்து , பல காலம் ஆயிற்று , எனது பிள்ளைகள் தமிழ்நாட்டையே வரைபடத்தில் தான் பார்த்திருக்கின்றனர் , எதுக்கு அடுத்த பரிமாணம் , அவர்கள் தமிழை படிப்பார்களா  என்றெல்லாம் கவலை நமக்கு  வேண்டியவதில்ல்லை ,


 ஏனெனில்  ஒவ்வொரு கால கட்டத்திலும் தமிழ் நமக்கு வசப்படுகிறதோ இல்லையோ , தமிழர்களாகிய நாம் தமிழுக்கு வசப்படுகிறோம் , நம் அடுத்த தலைமுறையில் மட்டும் அது நிற்கவா  போகிறது ?   நாம் அல்லவா   மேலும் செம்மையாக அவர்கள்  கற்க  அடித்தளம் அமைக்க வேண்டும் ? 

தமிழ் படித்தால் வேலை கிடைக்காது என்று சொல்லும் நிலை மாறி  தமிழ் படி எப்படி வாழ்வது என்று தெரியும் , தமிழ் படி உலகம் முழுவதும் உள்ள பல்கலைக்கழகங்களில் பணியாற்றலாம் , தமிழ் படி  பிற நாட்டு   மக்கள் தமிழை விருப்ப பாடமாக படிக்கின்றனர்  , தமிழ் படி , கற்ற கல்வியும் , பெற்ற செல்வமும் , சுற்றமும் , சூழலும் மேம்படும்  என்று சொல்லும் நிலை வர வேண்டுமல்லவா ?

இதனை நோக்கி நம் தமிழ் சமூகம் பயணப்பட பாதை அமைத்து கொடுக்கும் ஹார்வர்ட் பல்கலை கழகத்தின் தமிழ் இருக்கை பற்றி அறிந்து கொள்ளவும் , அதற்கு மிச்சிகன் வாழ் தமிழர்களின் , மிச்சிகன்  தமிழ் சங்கத்தின்  முயற்சியையும்  வாருங்கள் நண்பர்களே தெரிந்து கொள்ளுவோம் .

நன்றி வணக்கம் !!!
https://youtu.be/rI8CDfwsx_Y

Thursday, September 28, 2017

மறைக்கப்படும் மனிதர்களின் நம்பிக்கைக் குரல் - (ஆசியாவின் நோபல் பரிசான Ramon Magsaysay விருது பெற்ற Mr .Besweda Wilson அவர்களின் உரை )

செப்டம்பர் 23 2017 - திரு வில்சன் அவர்கள் மிச்சிகன் யூனிவெர்சிட்டியில்  இந்தியாவில்  தீண்டாமையின் உண்மை நிலையை விளக்கி  Manual Scavenging in India - The Stark reality of Untouchability - எனும் தலைப்பில் உரையாற்றினார் .   

யார் இந்த வில்சன் என்று கேட்பவர்களுக்கு  - https://en.wikipedia.org/wiki/Bezwada_vilson .

இதில் கலந்து கொள்ளும் வரை   - மனிதக் கழிவை மனிதன் அள்ளும் கொடுமை இந்தியாவில் அவ்வளவு பரவலாக இல்லை , தொழில்நுட்பம் பெருகி விட்டது இப்போது  இந்த முறை வழக்கொழிந்து விட்டது என்றுதான் எண்ணிக் கொண்டிருந்தேன் . 

இந்தியாவில் இன்றும் லட்சம் குடும்பங்களுக்கு மேல் இதில் இன்னமும் கட்டாயத்தால் ஈடுபடுத்தப்படுகிறார்கள் என்பதும் , இதனை தடுக்க 1993 ஆம் ஆண்டே சட்டம் இருந்தாலும் இதுவரை ஒருவர் கூட கைது செய்யப்படவில்லை என்பதும் , இந்தியா அரசாங்கம் தொடர்ந்து  உலக அரங்கில் மறுத்தும் , உள்ளூரில் மறைத்தும் வருகிறது என்பது அதிர்ச்சியாக இருந்தது .

இதற்கு எதிர்ப்பு தெரிவித்துதான்   வில்சன் என்னும் மாமனிதர்  குடும்பம் மறந்து , தூக்கம் மறந்து மக்களின் மேம்பாட்டிற்காக முப்பது ஆண்டுகளுக்கும் மேலாக இடைவிடாது    போராடி வருகிறார் . 

சந்தித்து உரையாடும் போது  கருப்புச் சட்டைகாரர்கள் தானே நீங்கள்?  உங்கள் அமைப்பு (  பெரியார் -அம்பேத்கர் படிப்பு வட்டம் அமெரிக்கா ) பற்றி  வந்தவுடன் அறிந்து கொண்டேன் என்று தமிழில் பேசி ஆச்சிரியப்படுத்தினார் .  எங்கெல்லாம் வேலை செய்தாரோ அங்கே இருந்த மொழிகளை பேசவும் எழுதவும் கற்றுக் கொண்டிருக்கிறார் என்பதை பின்பு கேட்டு அறிந்து கொண்டேன் .  

மிகவும் தன்மையான மனிதர் , தன்னம்பிக்கை தரும் கம்பீரம் , தீர்க்கமான வாதங்கள் ,  தான் எடுத்த நிலையில் தெளிவு , அநீதிக்கு எதிராக கண்களில் தெரியும் கோவம் , அது வார்த்தைகளில் வெளிப்படாமல் கோர்வையாக பேசும் பக்குவம் .     இப்படி  ஒரு மனிதரை சந்திக்க வாய்ப்பு கிடைத்தமைக்கு   மிச்சிகன் யூனிவெர்சிடியின் உளவியல் துறை பேராசிரியர் திரு.ராம் மஹாலிங்கம் அவர்களுக்கு   நன்றி சொல்ல வேண்டும் .

அவர் உரை முழுவதும் சுட்டெரிக்கும் கேள்விகள் , அரசாங்கங்களையும் , அதிகாரங்களையும் கேட்டு கேட்டு பதில் வராமல் போனதால் இன்னும் வேகமாக வந்து விழுகின்றன அவர் கேள்விகள் .   அவர் கேட்கும் கேள்விகள் மூலம்  உரையின் சாராம்சத்தை விளக்கலாம் என்று முயற்சித்திருக்கிறேன்.

 புறவாசல் வழியே வந்து , அதன் வழியே போகும் முகம் அறியாத  , நீங்கள்   அறிந்து கொள்ள விரும்பாத மனிதர்களை பற்றி உங்களுக்கு என்ன தெரியும் ?   - Safai Karmachari Andolan அமைப்பை   நான் தொடங்கவில்லை , தான் இந்த நிலையில் இருப்பதை ஏற்றுக் கொள்ளாத நாராயண அம்மா , சரோஜினி போன்றோர் தான் இதற்கு முன்னோடிகள் . 

 ஒரு மனிதனை , அவன் மனிதத்தன்மையை அழிக்க  எவரோ ஒருவரின்  கழிவை  வெறும் கைகளால் சுத்தம் செய்ய சொன்னால் போதும் இதுதான் இந்த சமூகம் விரும்புகிறதா ?

 தீண்டத்தகாதவன் என்று நீங்கள் சொல்வதை என்னால் ஏற்றுக் கொள்ள முடியாது , நான் இதுதான்   செய்ய வேண்டும் என்று என் பிறப்பை கொண்டு முத்திரை குத்துவதற்கு நீங்கள் யார் ?

சட்டம் இயற்றி 23  ஆண்டுகளாகியும் ஒருவர் கூட கைது  செய்யப்படவில்லை . ஒருவர்இ மீது கூட வழக்கு பதிவு இல்லை ,தற்கான சட்டம் இருப்பதாவது அனைவர்க்கும் தெரியுமா ?

உலகின் அனைத்து   நாடுகளுக்கும் சென்று உரையாற்றும் பிரதமர் , இந்தியா நாடளுமன்றத்தில் இந்தியாவில் இந்த முறை நடைமுறையில் இருக்கிறது என்பதையும் , சமூகம் தன் கொடூர கரங்களால் இந்த மனிதர்களை வதைக்கிறது என்பதையும் ஒப்புக்கொள்ள தயாராக உள்ளாரா ? 

தூய்மை இந்தியா , ஊழல் இல்லாத இந்தியா , கறுப்புப்பணம் இல்லாத இந்தியா , புல்லட்  , மெட்ரோ ட்ரெயின் என்று அனைத்துக்கும் தேதி குறித்து  செயல்படுத்தும் இந்தியா அரசாங்கத்திடம்      இந்த முறை எப்போது ஒழியும் என்பதற்கு பதில் உள்ளதா ? 

இதற்கு பதில் இல்லாமல் வளர்ச்சி பற்றி பேசுவது உண்மையான வளர்ச்சியா ?

ஒரு  ராக்கெட்டில் 104 செயற்கைகோள் செலுத்தும் இந்தியாவிடம் , மனித கழிவை மனிதன் தான்  அள்ள  வேண்டும் என்ற நிலையை மாற்ற ஒரு கண்டுபிடிப்பு கூட ஏன்  இல்லை ?

நாங்கள் கணக்கு எடுத்த  வரையில் எங்களுக்கு தெரிந்து 1470  பேர் இந்த வேலையில் விஷவாயு தாக்கி இறந்திருக்கிறார்கள் , தெரியாமல் எத்தனை   பேர் ?

இது இயற்கை    மரணமா  ? இல்லை அரசியில் படுகொலை .

2017 இல் - 54  பேர் தீவிரவாதத்துக்கு பலியாகி உள்ளனர் , ஆனால் 117  பேர் கழிவு அள்ளும்போது பலியாகி உள்ளனர் . அரசாங்கம் இதனை மறுக்கிறது . 10  மாடு செத்தால் தேசிய ஒற்றுமையும் , தலைப்பு செய்தியும் ஆகிறது , மனிதர்கள் இறந்தால் செய்தி வருகிறதா ??

எத்தனை பேர் கைகளால் மலம் அள்ளுகிறார்கள் என்ற கணக்கு   இல்லாத  ஒரு அரசாங்கம் , நாட்டில் உள்ள மாடுகளை கணக்கு எடுக்கிறது ?

100 % தலித்துகள் மட்டுமே இதில் ஈடுபடுத்தப்படுகிறார்கள் , இது எந்த வகையில் நியாயமாக  படுகிறது ? 

படிப்பறிவு இல்லை , பணம் இல்லை அதனால் செய்கிறீர்கள் என்று நீங்கள் வாதிக்கலாம் ,  40  சதவீத மக்களுக்கு இந்தியாவில் படிப்பறிவு இல்லை , 50  சதவீதத்துக்கும் மேல்  உள்ள மக்களுக்கு பணம் இல்லை அனாலும் அவர்கள் அனைவரும் இதனை    செய்வதில்லை ஏன் ? 

தூய்மை இந்தியா என்று சொல்லும் அரசியல்வாதிகள் ,  man hole இல் இறங்கி ஒரு முறை சுத்தம் செய்ய தயாரா ?  ஆள் வைத்து குப்பையை கொட்டி , புகைப்படம் எடுக்க சுத்தம் செய்வதுதான் தூய்மை இந்தியாவா ?

நாட்டிலேயே இந்திய ரயில்வேதான் மனித கழிவை அள்ளுவதற்கு   நிறைய மக்களை நிர்பந்திக்கிறது    ஆனால் மத்திய அரசாங்கம் அதனை தொடர்ந்து மறுக்கிறது .

நீங்கள் வாழும் சமூகத்தில் மனிதனை மிருகத்தை விடவும் கேவலமாக நடத்துவதை நீங்கள் அனுமதிக்கிறீர்களா ?

இறுதியில் ஒரு தகவலை சொல்லி உரையை முடிக்கிறேன் .   காந்தி  அடுத்த பிறப்பில் தலித்தாக பிறக்க ஆசைப்பட்டாராம் , கோயம்பத்தூரில் உள்ள மணி , தான் வாழ்நாள் முழுவதும் மலம் அள்ளி ஜூலை முப்பது 2017 இல் ஓய்வு பெற்றார் அவர் சொன்னது நான் செய்ததை இந்த பிறப்பில் ஏன் தலைமுறை செய்யக் கூடாது .

எனக்கு காந்தி    சொன்னதைவிட  மணி சொன்னதுதான் முக்கியம் .

உரைக்கு பின் பெரியார் -அம்பேத்கர்  படிப்பு வட்ட நண்பர்கள் எங்களால் என்ன உதவி செய்ய முடியும் என்று  திரு வில்சன் உடன் ஆலோசித்தோம் ,  பண உதவி பெற்று சிலரை மீட்பதை விட  இதில்ஒ ஈடுபட்டுள்ள ஒரு  லட்சத்திற்கும் அதிகமான குடும்பங்களை மீட்க வேண்டும் என்று தீர்க்கமாய் சொன்னார் .

தன் அமைப்பு மூலம்  அவர்  திரட்டிய கோப்புகளில் உள்ள தகவல்களை கணினி மயமாக்கவும் ,  இந்த முறையை    ஒழிப்பதற்கு  தொழில்    நுட்பம் தொடர்பான தகவல்களை பரிமாறுவதற்கும்  அவரிடம் பேசி உள்ளோம் . 

மிச்சிகனில் உள்ள சில நண்பர்களும் உதவி செய்வதாக இணைந்து உள்ளனர் . முதற் கட்டமாக எங்கள் மின்னஞ்சல்களை அவரிடம் பகிர்ந்து உள்ளோம் . ஏதாவது ஒரு புள்ளியில் தொடங்க   வேண்டும் அல்லவா ? 

நரகலின் கறை அழியாமல் படிந்திருக்கும் மனிதர்கள் நம்மை சுற்றி இருக்கும் சமூகத்தில் இருந்துகொண்டு , வல்லரசு என்றும் ,தூய்மை இந்தியா என்றும் எப்படி பெருமை பேச முடிகிறது  ???  (இது so called 56 inch மனிதர்களுக்கும் பொருந்தும் ). 



                                                                                                                                                                  -பாவி 
                                                                                                                                         paavib.blogspot.com

Tuesday, September 19, 2017

பெரியார் -அம்பேத்கர் படிப்பு வட்டம் -மிச்சிகனில் நடத்திய பெரியார் பேச்சுப் போட்டி - தோற்றமும் , நிறைவும் கட்டுரையாக .

 பெரியார் -அம்பேத்கர் படிப்பு வட்டத்தின் சார்பில் பெரியாரின் 139 வது பிறந்த நாளை முன்னிட்டு ,இளையோருக்கான பேச்சுப் போட்டியை  நடத்தினோம் , மிகச் சிறப்பாக நடை பெற்ற நிகழ்ச்சியின்  கட்டுரை.

பெரியாரின் கருத்துக்களை அடுத்த தலை முறைக்கு எப்படி எடுத்துச் செல்வது என்ற கேள்வி படிப்பு வட்டத்தின் கலந்துரையாடலில் அதிகமாக கேட்க்கப்பட்டது . அதனை பற்றி உரையாடும்தபோது  தோழர் நிர்மல் பேச்சுப் போட்டி என்ற   யோசனையை முன் வைத்தார் . இது நல்ல கருத்தாக பட செய்யலாம் என்று முடிவெடுத்தோம் ,  பின் மிச்சிகன் மாகாணத்தின் உறுப்பினர்களின் ஒத்துழைப்பை கேட்கலாம் என்று முதல் புள்ளி உருவானது .

இதற்கான முதல் கூட்டம் , நம்புங்கள் - மிச்சிகனில் உள்ள ஒரு  பூங்காவின்  மரத்தடியில்  அமர்ந்து   விவாதித்தோம் .  பரிசுப் பணம் , எப்படி நடத்துவது , சில தலைப்புகள் , என்னென்ன முன்னேற்பாடுகளை செய்வது என்று அந்த கூட்டத்தில் பேசி முடிவெடுக்கப்பட்டது .

ஆனால் அனைவர்க்கும் இருந்த கேள்வி பெரியாரைப் பற்றிய பேச்சுப் போட்டி என்றால் ,  யாரேனும் பேச வருவார்களா என்பதுதான்  .  மிகுந்த யோசனைக்கு பிறகு  யாரும் பேச வரவில்லை என்றால் எங்கள் குழந்தைகளை வாழ்க பெரியார் என்ற அளவிலாவது பேச செய்வது , ஒன்று அல்லது இரண்டு குழந்தைகள் வந்தால் கூட வெற்றி தான்  , என்ன   நடந்தாலும் நடத்துவது என்று முடிவு செய்தோம் .

அரங்கம் வேறு பதிவு செய்ய வேண்டும் , சரி   ,அதனை தள்ளிப்    போட   முடியாதென்று  மிகுந்த மன  தைரியத்துடன்  50 பேர் அமரும் அளவு ஒரு அரங்கத்தை பதிவு செய்தோம் .

என்ன என்ன தலைப்புகள் கொடுக்கலாம் என்று படிப்பு வட்டத்தில் பல்வேறு மாகாணங்களில் உள்ள தோழர்களை கலந்தோசித்து ஒரு வழியாக தலைப்புகள் முடிவாயின .

இனி மார்க்கெட்டிங் எப்படி செய்வது என்று யோசித்தோம் -  தமிழ் ஆங்கிலம் இரண்டு மொழிகளிலும் விளம்பரங்ககளை தயார் செய்து  , படிப்பிய வட்டத்தினர் வசிக்கும்  மற்றும் அதனை சுற்றி உள்ள பகுதிகளில் இருக்கும் , இந்தியன் மளிகை கடைகள் , உணவகங்கள் என்று ஒவ்வன்றிலும் பேசி அனுமதி வாங்கி விளம்பரங்களை ஒட்டினோம் , எங்கள் படிப்பு வட்டத்தினரில் குழந்தைகள் கூட ஆர்வமாக இதில் பங்கேற்றனர் .இது  எங்களுக்கும் ஒரு வித்தியாசமான அனுபவமாக இருந்தது  .

அனைத்து இடங்களிலும் விளம்பரங்களை வைத்தாயிற்று . மிச்சிகன்  தமிழ் சங்கத்தை தொடர்புகொண்டு , சங்கத்து உறுப்பினர்கள் அனைவருக்கும் மின்-அஞ்சலும் அனுப்ப ஏற்பாடு செய்தோம் .

இத்தனை   செய்தும் முதல் இரண்டு வாரங்கள் கனத்த மவுனம் . நாங்கள் எங்களுக்குள் தொலைபேசியில் அழைத்து அழைப்பு வந்ததா என்று அடிக்கடி கேட்டுக் கொண்டோமே தவிர ஒரு அழைப்பும்   வரவில்லை.
காலியான இருக்கைகளை வைத்து பிரம்மாண்ட வெற்றி என சில கட்சிகளை  போல நடிக்கவும் தெரியாது .

என்ன செய்யலாம்  என்று இருக்கையில் , வந்தன அழைப்புகள் (தோழர் திருமலை ஞானம் நண்பர்களிடம் பேசி முதலில் பதிவு செய்ய வைத்தார் ) . கொஞ்சம் கொஞ்சமாக , அழைப்புகள் வர  22 குழந்தைகள் வரை பதிவு செய்தனர் .

அரங்கம் நிரம்புமா என்ற நிலை மாறி  , அரங்கம்  போதுமா?  என்ற நிலை வந்தது . சமாளிப்போம் என செப்டம்பர் 16 ம் தேதிக்கு காத்திருந்தோம் .

அன்றைய தினம் , நிற்பதற்கு இடம் இல்லை , அத்தனை கூட்டம்  80 கும் அதிகமானோர் வந்திருந்தனர் . மிச்சிகன் தமிழ் சங்கத்தினர் ஆதரவு அளித்து , நிகழ்ச்சி முடியும் வரை உடன் இருந்தனர் .

முதல் நிலை , இரண்டாம் நிலை என்று இரண்டு பிரிவுகளிலும் சேர்த்து மொத்தம் 20 குழந்தைகள் பெரியாரின் கருத்துக்களை சுற்றி சுற்றி பிரித்து மேய்ந்தார்கள் . இளங்கன்று பயமறியாது அல்லவா ? பெரியவர்களை பேச சொன்னால்  தயங்கி சில கருத்துக்களை சொல்லி இருக்க மாட்டார்கள் , ஆனால் குழந்தைகள் எந்த வித தயக்கமும் இல்லாமல் பொட்டில் அடித்தாற்போல பேச பேச அருகில் இருந்த எங்களுக்கு  மகிழ்ச்சி சிறுது சிறிதாக ஊற்றெடுத்து கரை புரண்டு ஓட ஆரம்பித்தது . எதற்காக ஆரம்பித்தோமோ அது சேரும் இடத்தில் சேர்ந்து விட்டதாகவே நினைக்கிறோம் .

மூன்று நடுவர்களை அழைத்திருந்தோம் , மதிப்பெண்களை அவர்கள் வழங்க சிறு குழந்தைகளுக்கான பிரிவில் , புள்ளி அடிப்படையில்   தான் வேறுபாடு  , அதனால் இரன்டு சிறப்பு பரிசுகளையும் சேர்த்தி கொடுத்தோம் .

தோழர் நிர்மல் வரவேற்பு உரை நிகழ்த்தினார் , தோழர் பிரேம்  தமிழக விவசாயிகளின் தற்கொலைகளை தடுக்கவும் , நீட் தேர்வை மாநிலப்   பட்டியலுக்கு மாற்றவும் , கருத்து சுதந்திரத்துக்கு எதிரான தாக்குதலை கண்டித்தும்  ,நவோதய பள்ளிகளின் மூலம்  நடக்கும்    இந்தி  திணிப்பை எதிர்த்தும் ஆகிய தீர்மானங்களை நிறைவேற்றினார் . தோழர் பிரபாகர்   நிகழ்ச்சி முழுவதும் ஒருங்கிணைக்கும் பணியைச் செய்தார்.  தோழர் திருமலை ஞானம்  பெரியார் அம்பேத்கர் படிப்பு வட்டம் தொடங்குவதற்கான தேவையையும் , செயல்பாடுகளையும் விளக்கினார் . தோழர் அன்பு நிகழ்ச்சியை படம் பிடித்தார் .

 பின் நடுவர்களையும் , நிகழ்ச்சிக்கு வந்திருந்தோரையும் பெரியார் பற்றிய அவர்களின் பார்வையை பேச அழைத்தோம் , மிகவும் சுவாரசியமாக அவர்களின் பேச்சு இருந்தது . அவர்கள்   தொடர்ந்து சிறப்பாக செயல்பட பெரியார்- அம்பேத்கர் படிப்பு வட்டத்தினரை கேட்டுக்  கொண்டனர்   இந்த மாதிரி படிப்பு வட்டங்கள் இன்றைய சூழலில் அவசியம் என்றும் கூறினர் .  நடுவர்களில் ஒருவர் தன் சொந்த வாழ்க்கையில் பெரியார் ஏற்படுத்திய மாற்றங்களை  பகிர்ந்து கொண்ட போது நிறைய பேரின்  கண்கள்  குளமானது .  பெரியார் என்ற மனிதனை பின்பற்றுவதற்காக பெருமையாக உணர்ந்த தருணம் அது .  அவர் பகிர்ந்து கொண்ட அனுபவத்தை எழுத அவரிடம் அனுமதி கேட்டிருக்கிறேன் , அவர் அனுமதித்தால் எழுதுகிறேன் .

 இறுதியாக என் நன்றியுரையுடன் நிகழ்ச்சி முடிவடைந்தது .

அனைவரும் குழந்தைகள் என்பதால்   பேசின அனைத்து   குழந்தைகளுக்கும்  பரிசும் , சான்றிதழும் , நினைவுப் பதக்கமும் கொடுத்தோம் . அவர்கள் வாழ்க்கையின் என்றேனும் ஒருநாள் , தானாக தேடி பெரியாரைப் படிப்பார்கள் என்ற நம்பிக்கை எங்களுக்கு உள்ளது . இப்பொது நாங்கள் தேடி படிக்கிறோமே அதைப் போல , பெரியாரின் கருத்துக்கள் ஒரு தலைமுறையுடன் முடிந்து விடுவதில்லை , இது தமிழர்களிடையே தலைமுறை தலைமுறையாக தொடரும்  ஏனெனில் அவரின் கருத்துகளுக்காக தேவை எல்லா காலங்களிலும் உள்ளது .

Monday, September 11, 2017

முகம் தெரியாதவர்களுக்காக நான் ஏன் Neet ஐ எதிர்த்து குரல் கொடுக்க வேண்டும் ?

செப்-1  அனிதாவின் மரணச்  செய்தி கேட்டதும்   வருத்தமே   மேலோங்கி இருந்தது , பின் வருத்தம் கோவமாக மாற  இதற்கு எதிர்வினை ஆற்ற வேண்டும் என்று தோன்றியது . ஒத்த கருத்துள்ள நண்பர்கள் சேர அமெரிக்காவின் மிச்சிகன் - நோவி நகரில் இரங்கல் கூட்டம் செப்-2  இல் நடத்தினோம் . செப் -10  இல் ரோசெஸ்டர் நகரில் இரண்டாவது கூட்டம் நடத்தினோம்

இரங்கல் கூட்டமாக மட்டும் இல்லாமல் , நீட் என்றால் என்ன ? அதன் பாதிப்புகள் முதலியவற்றை விளக்கும் நிகழ்வாகவும்  இருந்தது  .  தொடர்ந்து நண்பர்கள் நீட் பற்றிய விளக்கங்களை  கொண்டு செல்வதற்காகவும்   அதன்  பாதிப்புகளை விளக்கவும்  , கல்வியாளர்கள் , நீதிபதிகள் , சமூக அக்கறை உள்ளவர்கள் , நீட் ஐ எதிர்த்து தொடர்ந்து குரல் கொடுப்பவர்கள்  ஆகியோரை பல்வழி அழைப்பின் மூலம் தொடர்பு கொண்டு விளக்க கூட்டங்களை நடத்துகிறார்கள் .  அடுத்த கட்டமாக அமெரிக்காவில் 40   இடங்களுக்கு மேலாக  நடந்த இரங்கல் கூட்டத்தில் பங்கேற்றவர்களின் கையெழுத்துக்களை சேகரித்து , இந்தியன் consulate  கு பெட்டிஷன் ஆக கொடுக்கவும்  முடிவு  செய்துள்ளார்கள் .

இந்த இரண்டு வாரங்களுக்குள் whatsup  இல் ஆதரித்தும் எதிர்த்தும் நிறைய தரவுகள் . எதிர்த்து வந்தவை அதிகம் .

நீட் ஐ எதிர்க்கும் அனைவரும் , கட்சி சார்பானவர்கள் , நாமக்கல்லில் பள்ளிக்கூடம் நடத்துபவர்கள் , பிண அரசியில் செய்பவர்கள் , தனியார் மருத்துவ கல்லூரிகளினால் பயன் அடைபவர்கள் , அதனால் பாதிக்கப்பட்டு இடம் கிடைக்காமல் போனவர்கள் அல்லது தன் சுற்றி உள்ள நெருங்கிய உறவினர்கள் பாதிப்படைந்ததால் சுயநலத்துக்காக குரல் கொடுப்பவர்கள் என நிறைய சித்தரிப்புகள் நடந்தன , நடக்கின்றன .

நான் நீட் ஐ எதிர்க்க மேல சொன்ன எந்த காரணமும் இல்லை .

நீட் போராட்டங்கள் தமிழகத்தில் திட்டமிட்டு முடக்கப்படும் நிலையில் , தொலைக்காட்சிகள் , பத்திரிகைகள் சிலவற்றை தவிர்த்து பெரும்பாலும்     இச் செய்திகளை ஒளிபரப்பாத தருணத்தில் , பரபரப்புக்கு எல்லாரும் எழுதும் போது  நாமும்    எழுதலாம் என்று இரண்டு வாரங்களுக்கு முன்   எழுதாமல் இப்போது எதற்கு    எழுத வேண்டும்  ?   ஒரே காரணம் - தமிழகதில் இது அடக்குமுறைக்கு உள்ளாகும் போது
புலம் பெயர்ந்த தமிழர்கள் தொடர்ந்து குரல் கொடுக்க  வேண்டும் என்பதால் ,  இது நீர்த்து போகக்கூடாது
 என்பதால் எழுதுகிறேன்  .

மேல சொன்ன எந்த   காரணமும்  இல்லை என்றால் நீட் ஐ எதிர்த்து முகம் தெரியாத அனிதா போன்றோருக்காக நான் என் குரல் கொடுக்க வேண்டும்  ?? என்ன அவசியம் ?

முகம் தெரியாத யாரோ போராடியதன் பலனாகத்தான்  அரசாங்க பள்ளிகள் வந்தன - நான் படிக்க முடிந்தது .
முகம் தெரியாத யார், யாரோ  கொடுத்த நன்கொடையால்தான் - என் பள்ளி கட்டிடம் உருவானது .

முகம் தெரியாத எவரோ எடுத்த முடிவில்தான் - முதன் முறையாக , அரசாங்கப் பள்ளிகளில் கம்ப்யூட்டர் சயின்ஸ் பாடம் சேர்க்கப்பட்டது .

முகம் தெரியாத வேலை வெட்டி இல்லா யாரோ  செயல்படுத்தியதன் விளைவாக - கல்லூரியில் முதல் தலைமுறை பட்டதாரிக்கான ஊக்கத்தொகை கிடைத்து படிக்க முடிந்தது .

முகம் தெரியாத எனக்காக -  அவ்வளவு பழக்கம் இல்லாத  என் கல்லூரி சீனியர்கள்  CIT கல்லுரி     என்று பெயர் கேட்டதும்    எடுத்த இரண்டு மணிநேர நேர்முகத் தேர்வு வகுப்பால்தான் என்னால் IT  நேர்முகத் தேர்வில் வெற்றி பெற முடிந்தது .

நான் மட்டும் இல்லை  , முகம் தெரியதா எவர் எவரோ , செய்த செயல்களால்தான் நாம் இந்த நிலையில் இருக்கிறோம் நண்பர்களே . அவர்களுக்கு நாம் திருப்பிச்  செய்ய முடியுமா ? நம்மை தெரிந்துதான் குல கல்வி முறை வேண்டாம் என்று எதிர்த்தார்களா?  பிறப்பால் மட்டுமே கல்வி என்று இருந்திருந்தால் ஒரு சமூகத்தை தவிர நாம் எல்லாம் படித்திருப்போமா ?

இதனால் நான் நீட் ஐ முகம்  தெரியாத என் தம்பி தங்கைகளுக்காக , என் தமிழ் மாணவர்களுக்காக , பொருளாதார வசதி அற்ற என் சமூகம் ஆரம்ப சுகாதார நிலையங்களை இழந்து விடக் கூடாது என்பதற்காக , என் கிராமங்களில் மருத்துவ வசதி இல்லாமல் போய்  விடக்கூடாது என்பதற்காக , நான் , நாம் நீட் ஐ எதிர்த்து குரல் கொடுக்க வேண்டும் .

நம் முகம் தெரிவதோ , யாருக்காக நாம் எதிர்கிறோமோ அவர்கள் முகம் நமக்கு தெரிவதோ முக்கியம் இல்லை , நம் எதிர்ப்புக் குரல் தொடர்ந்து கேட்பதுதான் முக்கியம் .

உலகம் முழுவதும் உள்ள தமிழர்களே , வாருங்கள் பதாகை தாங்கி உரக்கச் சொல்வோம் நீட் எங்களுக்கு வேண்டாம் !!!!!!!!!!!!!!!!!

                                                                                                                          -பாவி

Friday, August 18, 2017

கேள்விக்கென்ன பதில் !!! - முழிகதை

என் அருமை மகள் அவள் அம்மாவின் மூலமும் , கார்ட்டூன்களின்  மூலமும் எண்களை கற்றுக் கொண்டிருக்கிறாள்.

 ஆனால் கேள்வி கேட்டு முழிக்க  வைப்பது மட்டும் என்னிடம் . அறிவாளி என்று நினைத்து கேட்கிறாளோ இல்லை எப்படியும் தெரிய போவதில்லை கேட்டு வைப்போம் என்று கேட்கிறாளோ  தெரியவில்லை .

நங்கள் சென்ற கடையில்  நிறைய lane கலில் எண்கள்  இடம் பெற்று இருந்தன .  அதனை பார்த்துக் கொண்டிருந்த மகளை நானும் சேர்ந்து பார்க்காமல் என்ன  கண்ணு பார்க்கிறாய் என்று கேட்டுவிட்டேன் , அமைதியாக இருந்திருக்கலாம் .

அப்பா 1  , 2, 3  , 9  வரைக்கும் ஒரு நம்பர் போட்டிருக்குது , ஏன் 10 , 11 ரெண்டு நம்பர் போட்டிருக்குது ?

கொஞ்சம் எளிமையான கேள்வி என்று நினைத்து சொன்னேன் , தங்கம் இது  ஒரு digit number 0 to 9 ,  10 , 11 , two digit number . என்று சொல்லி காலரை    தூக்கி வீட்டுக் கொண்டேன்  (பதில் சொல்லி விட்டோம் என்ற பெருமையில் )   . கேள்வியே அதற்கு அப்புறம்   தான்  என்று தெரியாமல் .

இல்லைப்பா , 1 to 9 ஒரு  தடவை தான் சொல்லுறோம் , டென் , elevenum  ஒரு தடவை தான் சொல்லுறோம் , அப்புறம் நம்பர் மட்டும் ஏன் ரெண்டு போடுறோம் சொல்லுப்பா .

அப்போது இருந்து இப்போ வரை முழித்துக் கொண்டிருக்கிறேன் . இது எல்லாம் ஏன் எனக்கு இவ்வளவு வருடமாக தோன்றவில்லை ? இதற்கு என்ன பதில் சொல்வது ?

தெரியவில்லை என்று ஒப்புக்கொண்டு அடுத்த கேள்விக்கு  காத்திருந்தேன் . அப்பா சாக்லேட் சாப்பிடலாம் வா என்று அழைத்தாள்   அருமை மகள் . இதற்கு மட்டும் தான் நீ பிரயோஜனம் என்று சொல்லுகிறாளா இல்லை நிஜமாலுமே கூப்பிடுகிறாளா என்று  தெரியவில்லை ,ஆனால்   சாக்லேட் நன்றாக இருந்தது .

திரு. கார்த்திகேய சிவசேனாதிபதி” -அவர்களுடன் நடைபெற்ற கலந்துரையாடல்

மிச்சிகன்     தமிழ் சங்கத்தின் மூலம் இந்த கலந்துரையாடல் ஏற்பாடு செய்யப்பட்டிருந்தது .

இந்த நிகழ்ச்சிக்கு அரங்கம்  நிரம்பிய கூட்டம்.நம்  மக்கள் தம் குழந்தைகளுடன்  வந்து பங்கேற்றனர்.

அவரை இதற்கு முன் சந்தித்து பேசியிருந்தாலும் , மறுபடியும் கலந்து கொள்ளலாம் என்ற ஆவலில் கலந்து கொண்டேன். ஜல்லிக்கட்டு என்றவுடன் , எல்லாரும் போல நாங்களும் ஒரு சிறு போராட்டத்தை மிச்சிகன் aburn hills  பகுதியில் அரங்கேற்றினோம் ஆனால் அதனால்    என்ன பயன் என்று தெரியாமல் இருந்தது . என் புருசனும் சந்தைக்கு போனான் கணக்கு என்று நினைத்துக் கொண்டிருந்தேன் . விடை இதில் தெரிய வந்தது.

வெளிநாடு வாழ் தமிழ் மக்கள்  நடத்திய ஜல்லிக்கட்டு போராட்டத்திற்கு   நன்றி சொல்லி  தொடங்கினார் . ஒவ்வொரு நாளும் மத்திய அரசாங்கத்திடம் உளவுத்துறை அறிக்கை சமர்பிக்குமாம் . அதில் தவறாமல் இடம் பெற்றவை , வெளிநாட்டில்  இருக்கும் தமிழர்கள் நடத்திய போராட்டம் . இது மிகப் பெரிய அழுத்தத்தை அரசாங்கத்திற்கு கொடுத்தது என்ற தகவலை கூறினார் . ஏதோ நாமும் ஒரு சிறு பங்களித்தோம் என்று மனதின் ஓரத்தில் ஒரு திருப்தி வந்தது .( வரலாறு முக்கியம் அல்லவா ?  )

 அதன்  மூலம் மத்திய அரசாங்கத்திற்கு  தொடர்ந்து ஏற்பட்ட அழுத்தம், தடை நீங்க எடுக்கப்பட்ட முயற்சிகள் , தமிழகத்தின் இன்றைய அரசியில் சூழ்நிலை , அதனால் ஏற்படும் ஆதங்கம் ,மாட்டு அரசியில், தம் அமைப்பின் மூலம் செய்து வரும் பணிகள் , உணவுப் பொருட்களின் மீது நடைபெறும் வணிக வன்முறையை
அவர் விவரிக்கும் போது இனி தொழிற்சாலைகளில்  நாம் உண்ணும் பழவகைகள்   முதற்கொண்டு தயாரிக்கப்படுமோ என்று அச்சமாக இருந்தது .

 வளர்ச்சித் திட்டங்கள்  என்ற பெயரால் விவசாயிகள் சந்திக்கும் அடக்குமுறை , அதனால் ஏற்படும் விளைவுகள் முதலியவற்றை விரிவாகவும்  தெளிவாகவும் விளக்கினார்.

 காவிரி டெல்டா மாவட்டங்களை பாலைவனம் ஆக்காமல் விட மாட்டார்கள் போல . உணவை இழந்துவிட்டு , தண்ணீரை மாசுபடுத்தி விட்டு  வளர்ச்சியை வைத்து என்ன செய்வது ?   ஏன் தமிழகத்துக்கு மட்டும் இவை வருகின்றன ? காவிரியில் மீத்தேன் இருந்தால் கங்கையில் இருக்காதா என்ன ? ஏன் அங்கே போகவில்லை என்ற சிந்தனைகள் கிளை பரப்பி என்னுள் ஒடத் தொடங்கின.

#saveTamilnaduFarmer அமைப்பின் மூலம் தற்கொலை செய்து கொண்ட விவசாயிகளின் குடும்பத்திற்கு செய்து வரும் பணிகள்    எடுத்துரைக்கப்பட்டது.    அந்த குடும்பங்களை  விசாரித்து கண்டறிந்து அவர்களுக்கு தேவையான  வாழ்வாதார பணிகளுக்கும் , அக்குடும்பங்களில் உள்ள குழந்தைகளின் கல்விக்கும் இவர்கள் உதவி புரிந்து வருகிறார்கள் .

நடிகர்கள் சித்தார்த் மற்றும் பாலாஜி இவர்களுக்கு உறுதுணையாக இருந்து உதவி புரிகின்றனர். நல்ல முயற்சி . நம் மக்கள் ஆர்வமுடன் இந்த அமைப்பிற்கு நன்கொடை வழங்கினர்

பின் கேள்வி பதில் . விவசாயம் செய்ய போகிறேன் . மாடு வளர்த்தலாம் என்று ஆசை என்ன மாடுகளை வளர்த்தலாம்   என ஒரு தம்பதி கேட்ட கேள்விக்கு ,   நான் சும்மா சொல்லிட்டு போயிடலாங்க ஆனா நிலைமை சரியில்லை , இங்கே இருந்தாவது நீங்கள் அங்கே இருப்பவர்களுக்கு உதவி செய்யலாம் , அங்கே வந்து விவசாயம் செய்தால் உங்களை காப்பாற்ற நீங்கள் போராட வேண்டி இருக்கும் , தேவைகளை குறைத்து முழுமையாக ஈடுபட்டால் மட்டுமே முடியும் என்று மனதில் இருந்து பதில் கூறினார் .

.தமிழ் சங்கத்தின் நன்றி உரையுடன் கூட்டம் நிறைவு பெற்றது.

அரசாங்கங்கள் , அதிகாரவர்க்கம் , செயல் இழந்து போன இன்றைய நிலையில்   , தன்னார்வலர்கள்  நமது மொழி, மக்கள் என்று உள்ளுணர்வால் உந்தப்பட்டு செய்யும் சேவைகளே தமிழ்நாட்டை இனி காப்பாற்றும் . நமக்கான அரசியிலை இனி நாம்தான் செய்ய   வேண்டும் போல  . தலைவர்களை , கட்சிகளை நம்பி இருந்தது போதும் .

ஆயிரக்கணக்கான தன்னார்வலர்கள் தொடர்ந்து தன்னாலான உதவிகளை செய்கிறார்கள் . இன்னும் ஐந்து அல்லது பத்து வருடத்தில் இவர்கள் சிறிது சிறிதாக உள்ளாட்சி அமைப்புகளை கைப்பற்றி பெரிய அமைப்பாக மாறுவார்கள் என்ற நம்பிக்கை உள்ளது . பார்க்கலாம் .
                                                                                     -paavi
                                                                                   paavib.blogspot.com

நினைவில் காடுள்ள மிருகங்கள் !!! (The Common Sense இதழில் வெளிவந்த எனது கட்டுரை )

https://drive.google.com/open?id=11ItjHDvPRhseyKgw95IQsJLSqQzxpUy4 --  முழு இதழையும் இணைத்துள்ளேன்   பாரம்பரியம் , கலாசாரம் பேசும்...